Hugur okkar er stöðugt að vinna úr upplýsingum og oft erum við að greina á milli þess hvað er gott og slæmt. Það er gott að Jói stökk út í sjóinn og bjargaði Gunna. En það er slæmt að veskinu hennar Ragnhildar var stolið o.s.frv.

En til að greina á milli góðs og ills verðum við að hafa einhverja línu sem greinir þarna á milli. Um leið og við segjum að eitthvað sé gott en eitthvað annað slæmt erum við að gera ráð fyrir því að þessi lína sem greinir á milli góðs og ills sé til.

En hvaðan kemur þessi lína? Er þetta lína sem við búum til fyrir okkur sjálf og notum en er svo farin þegar við deyjum? Eða er þetta lína sem við uppgötvum og vísum til og var þá til áður en við fæddumst og verður alltaf til?

Notum stærðfræðina sem dæmi. Við vitum að 2 + 2 = 4. En er þetta eitthvað sem við bjuggum til eða uppgötvuðum? Jú, fyrir 500 milljón árum síðan voru 2 + 2 = 4 þó engin manneskja hefði nokkurntíman skrifað þetta niður eða reiknað. Það er þannig að tungumál stærðfræðinnar lýsir raunveruleikanum eins og hann er, ef við reiknum rétt!

Og þannig er þetta líka með gott og illt. Rétt eins og 2 + 2 = 4 þá eru sumir hlutir sannarlega góðir og annað sem er sannarlega illt. Verkfræðingar nota stærðfræði til að reikna burðarþol og þannig er stór brú byggð. Á sama hátt er ekki hægt að byggja gott mannlegt samfélag nema við getum vísað til þessarar línu sem greinir á milli hvað er gott og illt. Þetta vitum við innst inni og gerum ráð fyrir í okkar daglega lífi, svona er raunveruleikinn.

Þessi lína sem greinir á milli góðs og ills liggur beint til Guðs og er skilgreiningin á því hver Guð er. Jóhannes, sem var einn af lærisveinum Jesú, skrifar þetta í 1Jóh 1:15b: "Guð er ljós, og myrkur er alls ekki í honum.” Af því að Guð er bara góður og gerir okkur mögulegt að þekkja hann þá getum við þekkt muninn á góðu og illu.

Þessi pistill fjallar um siðferðisleg rök fyrir tilvist Guðs. Smelltu hér til að horfa á ágætt myndband á ensku um sama rökstuðning.

Til íhugunar og framkvæmdar

1. Segðu frá atviki þar sem þú gerðir rangt og það sprakk í andlitið á þér, t.d. þegar þú laugst og það uppgötvaðist. Eða segðu frá tíma þar sem einhver laug að þér og það særði þig.
2. Lesið og ræðið Róm 2:13-16. Hvernig hefur þú séð lögmálið í hjarta þínu hafa áhrif á líf þitt?
3. Hvernig getum við þekkt vilja Guðs fyrir líf okkar? Hvernig getum við þekkt rétt frá röngu?
4. Hvaða skref hjálpa þér að lifa lífi þínu í sannleika og heiðarleika?
5. Hvaða afleiðingar myndi það hafa að lifa lífi sínu án þess virkilega að þekkja rétt frá röngu?  

Ágúst Valgarð Ólafsson er höfundur þessa pistils.

Hvernig er hægt að vita hvort Guð sé til?

Nýlega áttum við hjónin 20 ára brúðkaupsafmæli. Hjónabandið okkar er sterkara núna en nokkru sinni fyrr og við njótum þess að vera saman. En þegar við hittumst fyrst þekktumst við ekkert. Við fórum að hittast og vörðum miklum tíma í að tala saman. Þannig lærðum við að þekkja hvort annað. Ég lærði að þekkja hana, hvernig hún hugsaði, brást við aðstæðum og hún lærði sömuleiðis að þekkja mig. Við ákváðum svo að ganga í hjónaband, í góðri trú um að sú gagnkvæma þekking sem við höfðlum öðlast væri traust vísbending um framhaldið. Við gátum ekki sannað það vísindalega að hjónabandið yrði gott, en við völdum að treysta því á grunni fyrirliggjandi þekkingar.

Að eignast trú á Guð er sambærilegt ferli. Það er til fjöldi traustra staðreynda og raka fyrir tilvist Guðs. Ef við skoðum þetta með opnum huga getum við komist að þeirri niðurstöðu að Guðs sé til. Reyndar eru staðreyndirnar og rökin fyrir tilvist Guðs mun traustari heldur en traust okkar á fólki og jafnvel maka okkar, því Guð er eilífur og breytist ekki.

Því miður hefur sumt kristið fólk sagt hluti eins og: Ekki hugsa, bara trúa. Þetta er skaðlegt og beinlínis rangur skilningur á því hvað heilbrigð trú er. Heilbrigð trú er rökrétt afleiðing af því að hugsa skýrt.

Með því að kynna sér rökin fyrir tilvist Guðs með opnum huga (án þess að gefa sér niðurstöðuna fyrirfram), hugsa rökrétt, spyrja fullt af spurningum og ræða við aðra af gagnkvæmri virðingu vex þekking okkar á efninu - rétt eins og með alla aðra þekkingu. Þannig er hægt að vita hvort Guð sé til með nægilegri vissu til að taka afstöðu til þess.

Takk fyrir að heimsækja síðuna okkar. Við viljum gjarnan heyra frá þér ef þú ert með spurningu eða athugasemd.

Ágúst Valgarð Ólafsson er höfundur þessa pistils og hann predikaði um þetta efni 4.sept 2016. 

Til umræðu eða íhugunar

1. Hefur þú heyrt því fleygt að hugsun sé slæm fyrir trú? Eitthvað í þeim dúr að: Ekki hugsa, bara trúa?
2. Þið sem eruð sannfærð um að Guð sé til, hvernig komust þið að þeirri niðurstöðu? Ræðið í hópnum.
3. Hver eru helstu rök þín fyrir því að Guð sé til? Hafðu í huga 1Pét 3:15-16 Það er gott að æfa sig í því að telja upp þessi rök eftir minni í öruggum hópi. Ef þú mannst lítið, ekki örvænta. Það er hægt að hugsa, lesa, læra smátt og smátt.
4. Hefur þú tekist á við efasemdir? Ertu að takast á við efasemdir núna? Ræðið hvað eru góðar leiðir til að vinna úr efa, og e.t.v. hvað eru dæmi um slæm viðbrögð gagnvart þeim sem efast.
5. Ágúst líkti því ferli að eignast trú á Guð við það ferli að kynnast maka og ganga í hjónaband. Ræðið þessa líkingu (þú þarft ekki að vera sammála þessu!).