Á hverjum miðvikudegi birtist nýr pistill. Sendu okkur línu ef þú ert með hugmynd að pistli eða ef þú ert með spurningu sem mætti svara með pistli.

Allir trúa á eitthvað!

Skrifað af Ágúst Valgarð Ólafsson. Posted in Pistlar

Allir trúa á eitthvað! Við hringjum og pöntum pizzu í þeirri trú að pizzan skili sér. Við póstleggjum bréf því við trúum því og treystum að bréfið muni skila sér á leiðarenda. Í stuttu máli sagt: Það er ekki hægt að lifa daglegu lífi eðlilega án þess að trúa á vissa hluti.

Ég sit í stól núna. Ég settist í stólinn í góðri trú um að stóllinn væri nógu sterkur til að brotna ekki undan mér. Eftir að hafa sest breyttist trú mín í þekkingu með því að sannreyna að stóllinn hélt mér. Núna veit ég að stóllinn heldur.

Allir trúa á eitthvað - myndir þú treysta þessum stól?

Allir trúa á eitthvað. Spurningin er bara  á hvað við trúum. Ef við trúum á eitthvað sem ekki stenst þegar á reynir verðum við oft fyrir skaða. Rétt eins og stóllinn sem ég settist í hefði brotnað með þeim afleiðingum að brotin spýta hefði stungist í bakið á mér.

Þá vaknar spurningin: Hvernig greinum við á milli þess hvað stenst traust okkar og hvað ekki? Það fyrsta sem við notum er rökhugsun okkar og getan til að greina á milli þess hvað er satt og ósatt. Ef ég sé að einn af fjórum fótum stólsins er skakkur þá get ég dregið þá ályktun að stóllinn sé ótraustur. Eða, ef ég sé auglýsingu frá pizzastað og heimasíða staðarins er óvirk þá er ólíklegt að ég hringi þangað til að panta pizzu.

Við getum notað rökhugsun okkar og greind fyrir hversdagslega hluti eins og dæmin hér að ofan sýna, en einnig við stóru spurningar lífsins eins og: Trúi ég á Guð? Hvers vegna erum við hér? Hvernig varð lífið til? Er til illt í veröldinni? Við notum augun og skoðum stólinn áður en við setjumst til að afla gagna og staðreynda um það hvort stóllinn haldi. Á sama hátt getum við notað skilningarvit okkar og rökhugsun til að skoða staðreyndirnar um það hvort Guð er til. Ef við komumst að því að meiri líkur séu á því en minni getum við ákveðið að leggja trúnað á það og lifað svo lífi okkar samkvæmt því. 

Annað sem við notum til að greina á milli þess hvað er satt og ósatt er reynsla okkar. Ef títt nefndur stóll brotnar þá forðast ég upp frá því stóla af þessari gerð eða sest í þá með varúð. Brennt barn forðast eldinn. Sömuleiðis, ef ég legg trúnað á það að Guð sé til og lifi samkvæmt því þá mun reynsla mín staðfesta eða kollvarpa því hvort þetta sé satt.

Fleira má nefna sem við notum til að greina á milli þess hvað við getum sett traust okkar á. T.d. ef ég á góðan vin sem ég treysti og hann fullyrðir að stóllinn haldi þá er líklegt að ég trúi honum og láti reyna á að setjast í stólinn.

Aðal atriðið er þetta að allir lifa í trú og trú á Guð er um margt líkt því sem við leggjum trúnað á dags daglega eins og að bíllinn okkar fari í gang, börnin skili sé heim úr skólanum og annað þvíumlíkt. 

Ef þú vilt vita meira um hvaða rök eru fyrir því að Guð sé til þá endilega hafðu samband. Guð hefur aldrei ætlast til þess að við trúum á hann í blindni” eða þvert gegn því sem skynsemin segir heldur hefur hann opinberað sig fyrir okkur. Eftir að hafa skoðað rökin fyrir tilvist Guðs er það mín niðurstaða að það þurfi mun meiri trú til að vera guðleysingi heldur en að viðurkenna trú á Guð!

Ágúst Valgarð Ólafsson

Treystu Guði!

Skrifað af Þorsteinn Jóhannesson. Posted in Pistlar

Treysti ég Guði? Það er ósköp auðvelt að treysta Guði þegar allt gengur vel, ég get borgað reikninga, ég er heilbrigður, það eru engin vandamál í fjölskyldunni og mínu nánasta umhverfi. En hvað þegar eitthvað bjátar á, mun ég þá treysta Guði? Hvað ef ég myndi missa vinnuna, gæti ekki borgað reikninga og horfði fram á að gjaldþrot vofði yfir. Myndi ég treysta Guði? Hvað ef að ég treysti Guði en ég yrði samt gjaldþrota, mundi missa húsið og ætti í vandræðum að skaffa mat á borðið fyrir fjölskylduna? Myndi ég samt treysta Guði? Það er ekki hægt að vera viss fyrr en hlutirnir gerast, en Biblían er mjög skýr um að við eigum að treysta Guði.

Í Orðskviðunum 3:5 stendur Treystu Drottni af öllu hjarta, en reiddu þig ekki á eigið hyggjuvit.” Það er svo sem auðvelt að segjast ætla að treysta Guði en hvernig fer maður í raun og veru að því að treysta Guði?

Í mannlegum samskiptum þá byggist traust upp á reynslu. Það byggist á því að fjárfesta í tíma sínum með fólki, læra að þekkja aðra og eftir því sem tíminn líður þá kynnast fólki betur og vita þannig af reynslunni hvernig má treysta því. Það að treysta Guði byggist á nákvæmlega því sama, það þarf að kynnast Guði. Að verja tíma með Guði og eiga samskipti við hann. Þetta gerist með því að tala við hann og einnig með því að hlusta eftir því hvað hann segir. Guð talar t.d. í gegnum orð sitt Biblíuna þannig að það að hlusta á Guð er líka fólgið í því að lesa í Biblíunni.

Það eru mörg ár síðan ég byrjaði að reyna að treysta Guði og ekki hefur það alltaf verið létt. Síðan ég tók trú á Jesú hef ég svo sem aldrei efast um tilvist hans en ekki alltaf fullkomlega treyst því að hann myndi alltaf koma með bestu lausnina fyrir mig. Oft hefur ég verið að streða sjálfur í stað þess að láta hlutina í Guðs hendur og treysta því að hann muni vel fyrir sjá sama hvernig hlutirnir þróast. En þegar ég lít yfir það sem er að baki þá sé ég að hann hefur aldrei brugðist mér og allt það góða sem er í mínu lífi er frá honum. Einnig sé ég að þeir tímar sem auðveldast hefur verið að treysta Guði í mínu lífi hefur verið þegar ég hef passað að rækta samband mitt við Guð.

Ég trúi á almáttugan góðan Guð sem ég veit að ber umhyggju fyrir mér, ég veit það vegna fyrri reynslu og vegna þess að það stendur í Biblíunni (“Varpið allri áhyggju yðar á hann, því að hann ber umhyggju fyrir yður.” 1 Pét. 5:7). Ég veit að ég get treyst honum, en ég veit líka að ef ég vanræki vináttu mína við Guð og hef minni samskipti við hann mun verða erfiðara fyrir mig að treysta honum, vegna þess að ég hef fjarlægst hann.

Að lokum þá er hvatning mín til okkar allra: Verjum tíma með Guði svo að við vitum að við getum treyst honum af öllu hjarta.

Þorsteinn Jóhannesson

Góðir Ávextir – Gott Líf

Skrifað af Gunnhildur Stella Pálmarsdóttir. Posted in Pistlar

Biblían segir að gott tré beri góðan ávöxt en slæmt tré beri slæman ávöxt. Í grein einni sem ég las eftir Joyce Meyer sagði hún að líf okkar er oft eins og tré og hvern dag koma ávextir fram í lífi okkar. Ef okkar “tré” hefur fest rætur í skömm, gremju, reiði, sektarkennd, höfnun, vöntun á kærleika, vöntun á samþykki, neikvæðni, tilhneigingu til að dæma o.sfrv. þá munu ávextir lífs okkar ekki vera góðir. En ef ávextir lífs okkar eru fastir í náð, kærleika, miskunnsemi, jákvæðni, þolinmæði o.s.frv. þá munu ávextir lífs okkar vera góðir.

Sem kristnir einstaklingar þá er okkur ætlað að bera ávexti. Biblían talar um ávexti andans í Galatabréfinu 5: 23-34 sem eru “kærleiki, gleði, friður, langlyndi, gæska, góðvild, trúmennska, hógværð og sjálfsagi”. Það sýnir okkur að okkur er ætlað að bera ávexti. Eitt sinn fór ég á leiðtoganámskeið þar sem maður að nafni Scott Wilson var að tala. Hann talaði um að við ættum að prófa að mæla ávexti andans í lífi okkar. Mér fannst þetta nokkuð gott hjá honum því staðreyndin er sú að ákveðnir ávextir vaxa ef til vill hraðar í lífi okkar en aðrir. Okkur er ætlað að vaxa og fara fram á við hvern dag sem kristnir einstaklingar. Ef við til að mynda myndum skoða ávexti andans í lífi okkar í hverri viku og mæla þá frá skalanum 0 – 10 þá gætum við kannski eina vikuna séð að við höfum verið með yfir 7 í öllu nema kannski langlyndi (þolinmæði). Þá gætum við tekið næstu viku og virkilega beðið Guð að auka við okkur þolinmæði…. Síðan gætum við skoðað þá viku og vonandi séð að við höfum vaxið í þolinmæði.

Mín þrá er sú að ávextir lífs okkar allra séu góðir ávextir. Oft þarf að vinna í þessum neikvæðu og með Guðs hjálp að rífa þá upp með rótum til að góðu ávextirnir fái að vaxa í friði og ró. Mín þrá er sú að við sem kirkja þráum ennþá meira heilbrigði fyrir okkur sjálf, fyrir börnin okkar, fyrir unglingana okkar og fyrir samfélagið í kringum okkur. Mín þrá er einnig sú að við getum öll staðið saman, uppörvað hvort annað og talað jákvæða hluti inn í líf hvors annars og um hvort annað.

“Af ávöxtunum skulið þér þekkja þá”

Guð blessi þig í dag,

Gunnhildur Stella Pálmarsdóttir

Velkomin(n) á póstlistann okkar.

Skylt efni

Hvítasunnukirkjan á Selfossi