04.10.2008 09:53

Friður á friðlausum tíma

Það umrót sem hefur verið í fjármálaumhverfi Íslands síðustu daga hefur líklega ekki farið framhjá neinu okkar. Fólki er umhugað um sinn hag enda höfum við Íslendingar búið við mikið fjárhagslegt öryggi síðustu ár.

Óöryggi er óþægileg tilfinning sem getur verið mjög sligandi. Óöryggi hefur þó þann kost með í för að maður gerir sér betur grein fyrir því hversu vanmáttugur maður er og hversu mikilvægt og gott það er að treysta Guði.

Í Galatabréfinu 5. kafla er talað um ávexti andans. Þeir fyrstu þrír í þeirri upptalningu eru kærleiki, gleði og friður. Það að eiga frið Guðs í lífi sínu eru ótrúleg lífsgæði sem erfitt er að útskýra. Í Filipíbréfinu er eftir farandi sagt um frið Guðs:

"Og friður Guðs, sem er æðri öllum skilningi, mun varðveita hjörtu ykkar og hugsanir ykkar í Kristi Jesú."

Vinir, um leið og við þurfum að vera skynsöm og fara vel yfir stöðu okkar er mikilvægt að gæta þess að leggja hlutina í hendur Guði. Ert þú kvíðin? Þá skaltu biðja Guð um að gefa þér frið sinn og biðja um handleiðslu hans. Oft getum við ekki breytt vandamálunum en við getum breytt afstöðu okkar til þeirra, með Guðs hjálp. Þannig getur líf okkar vaxið í gegnum vandamálin í stað þess að þau verði til þess að brjóta mann niður.

Veldu í dag að meðtaka frið Guðs í líf þitt.

Guð blessi þig,

Aron

Skrifað af Aron

Tengill á færslu

Bæta við athugasemd

Sýna athugasemdir

04.10.2008 09:53

Friður á friðlausum tíma

Vafraðu um

Tenglar